జీవనం

ఎల్లవేళలా వడ్డించిన విస్తరి కాదు జీవితం

ఆకలిని అధికమించి సాగించాలి పయనం

ఎప్పుడూ నీవు మెచ్చిన రాగమే అడగనేల

తాళానికి అనుగుణంగా నర్తించడమే జీవనం

తోడు

ఒంటరిగా నువ్వు ఉంటే

తోడుగా వెంటరాని జనం

వాళ్ళు ఒంటరిగా ఉన్నప్పుడు

నీ తోడు కావాలని కోరతారు!

జ్ఞానం

బాదాంపప్పు తింటేకాదు జ్ఞానం పెరిగేది
జీవితంలో ఎదురుదెబ్బలు తింటే వస్తుంది
ఉన్నది ఉన్నట్లు చెబితే ఇలాగే ఉంటుంది
మసిపూసి మాయచేస్తే లోకం మెచ్చుతుంది

నిజాలు

నిజాలని నిర్భయంగా చెప్పే నేను

కాకున్నా కటువుగానే కనబడతాను!

కావాలంటే తీయగా మాట్లాడగలను

మాట్లడితే అబధ్ధాలకోరుని అవుతాను!

మాట

పెదవి దాటని పలుకులతో
మహారాణిని అవుతా నేను
పెదవి దాటి మాట్లాడినచో
వాటికి నే బానిసనవుతాను

కర్మఫలితం

జీవితంలో నీవు అనుకున్నది ఏదైనా సాధించాలని సాగిపో

సాగుతూ ఇతరుల మదిని చీలుస్తూ నీదారిని ఏర్పరుచుకోకు!

జీవితం నవ్విస్తే చేసిన మంచిపనులకి కర్మఫలితం అనుకో

ఏడిపిస్తే మంచి పనులు చేయవలసిన సమయం వచ్చెననుకో!

సాహాసం

ఇసుకరేణువులు వంటిది ఒక జీవితం..

గాజుముక్కలతో ఎందుకనో ఈ సావాసం

పట్టుకుంటే జారి ముట్టుకుంటే గుచ్చుకుని

అయినా కలిసి ప్రయాణం వృధా సాహాసం!