కళ్ళజోడు

అడుగు క్రింద ఆరడుగుల భూమి నీది కాదు
తెలిసి కూడా,  నిజం అని చెబితే నమ్మవు
చీకటే చుట్టి ఉన్నా వెలుగురేఖల్ని చూడమని
అబద్ధాన్ని చత్వారమంటూ కళ్ళజోడుగా వాడేవు

ఏం??

వలపుబాణాలు విసురుగా వేసి ఏం సాధిస్తావు

ఊపిరాడక వలపుగదిలో ఉక్కిరి బిక్కిరయ్యేవు

రిక్తహస్తాలని అందుకుంటే నిరాశతో నిట్టూర్చేవు

పొందలేక నల్లబడ్డ ప్రేమకి మెరుగులెన్నో దిద్దేవు

అబధ్ధం

జీవితం ఒక అందమైన అబధ్ధం
అందుకే దాన్ని అందరూ కోరుకుంటారు!
మృత్యువు భరించలేని చేదు నిజం
అందుకే దాన్ని ఎవ్వరూ కావాలనుకోరు!

అంతటా నేనే

అంతటా నేనే కనబడుతున్నానని
కనపడిన ప్రతికన్యకీ కన్ను కొట్టేసి
అమాయకంగా లవ్ యూ చెప్పేసి
కొంగట్టుకుని తిరుగుతున్నాననకు!

తర్వాత

అతుకువేస్తున్నా హృదయాన్ని విరిగిన  తర్వాత
నేను నవ్వుతున్నా వెక్కి వెక్కి ఏడ్చిన తర్వాత
నీపై వలపని తెలిసె నువ్వు దూరమైన తర్వాత
నిన్ను నాలో వెతుకుతున్నా నేనే నీవైన తర్వాత

అడగనా?

ఏమీ అనుకోనంటే ఒకటి అడగాలని ఉంది...
ప్రేమించడం నావద్ద నేర్చి...ఎవరిని ప్రేమిస్తున్నావని!
అడిగానని మరో కొత్తనేరాన్ని నాపై మోపకు...
నిన్ను ప్రేమించిన నేరానికి శిక్షే ఇంకా పూర్తికాలేదు!

ఒక కవిత

 లెక్కించి అక్షరాలు కాగితం పై ఖననం చేస్తే

ఒక కవిత ఏదో కనులు తెరిచి చూసింది...

ఇన్నాళ్ళు ఎక్కడ ఉన్నావు అని ప్రశ్నిస్తే

లెక్కలేనన్ని అలోచనల్లో చిక్కాను అన్నది!