సాహాసం

ఇసుకరేణువులు వంటిది ఒక జీవితం..

గాజుముక్కలతో ఎందుకనో ఈ సావాసం

పట్టుకుంటే జారి ముట్టుకుంటే గుచ్చుకుని

అయినా కలిసి ప్రయాణం వృధా సాహాసం!

నీది నాది

కొందరు ఇది నీదంటారు

కొందరు కాదు నాదంటారు

మరికొందరు నీదంతా నాదంటారు

నిజానికి ఏదీ నీది కాదు నాది కాదు

ఒక పరీక్షే

కష్టాలకి భయపడి పారిపోవడం సులభం

జీవితాన్ని పరికిస్తే ప్రతిక్షణం ఒక పరీక్షే...

పిరికివారు జీవితంలో ఏమీ సాధించలేరు

పోరాడేవారి పాదాల చెంతనే పట్టుపరుపు.

జీవితంలో

జీవితంలో.....

వెనుదిరిగి చూస్తే "అనుభవం" లభిస్తుంది

ముందుగా యోచిస్తే "ఆశ" అగుపిస్తుంది

కుడి-ఎడమలు చూస్తే "నిజం" తెలుస్తుంది

మనలో మనం చూస్తే "పరమాత్మ" కనిపిస్తుంది!

ఆశలపందిళ్ళు

నిన్ను నువ్వు మెచ్చుకుంటూ సాగిపో...
నీ గురించి చెడు చెప్పేవారు కోకొల్లలున్నారు!!
ఆశలపందిళ్ళు అందరూ అల్లుకుంటూనే ఉంటారు
పూర్తయ్యేవి మాత్రం అదృష్టం అచ్చి వచ్చినవారిదే!

విజయం

అటో ఇటో అనుకున్న వారే విజేతలవుతారు
మధ్యలో ఊగిసలాడేవారు ఊగుతూ ఉంటారు
కోరికల్ని జయించి కర్తవ్యాన్ని పాలించేవారు
ఎప్పటికీ క్రిందకి జారక శిఖరాగ్రాన్నే ఉంటారు

నా పిచ్చిరాతలు

ఏం రాయను మనసు భాషరాని దానను
ఏదేదో చెప్పాలి అనుకుంటాను చెప్పలేను
అక్షరాలు కరుణిస్తే  అందంగానే రాస్తాను
ఏదో రాసానని చదవడం మానరనుకుంటాను