మాట

పెదవి దాటని పలుకులతో
మహారాణిని అవుతా నేను
పెదవి దాటి మాట్లాడినచో
వాటికి నే బానిసనవుతాను

కర్మఫలితం

జీవితంలో నీవు అనుకున్నది ఏదైనా సాధించాలని సాగిపో

సాగుతూ ఇతరుల మదిని చీలుస్తూ నీదారిని ఏర్పరుచుకోకు!

జీవితం నవ్విస్తే చేసిన మంచిపనులకి కర్మఫలితం అనుకో

ఏడిపిస్తే మంచి పనులు చేయవలసిన సమయం వచ్చెననుకో!

సాహాసం

ఇసుకరేణువులు వంటిది ఒక జీవితం..

గాజుముక్కలతో ఎందుకనో ఈ సావాసం

పట్టుకుంటే జారి ముట్టుకుంటే గుచ్చుకుని

అయినా కలిసి ప్రయాణం వృధా సాహాసం!

నీది నాది

కొందరు ఇది నీదంటారు

కొందరు కాదు నాదంటారు

మరికొందరు నీదంతా నాదంటారు

నిజానికి ఏదీ నీది కాదు నాది కాదు

ఒక పరీక్షే

కష్టాలకి భయపడి పారిపోవడం సులభం

జీవితాన్ని పరికిస్తే ప్రతిక్షణం ఒక పరీక్షే...

పిరికివారు జీవితంలో ఏమీ సాధించలేరు

పోరాడేవారి పాదాల చెంతనే పట్టుపరుపు.

జీవితంలో

జీవితంలో.....

వెనుదిరిగి చూస్తే "అనుభవం" లభిస్తుంది

ముందుగా యోచిస్తే "ఆశ" అగుపిస్తుంది

కుడి-ఎడమలు చూస్తే "నిజం" తెలుస్తుంది

మనలో మనం చూస్తే "పరమాత్మ" కనిపిస్తుంది!

ఆశలపందిళ్ళు

నిన్ను నువ్వు మెచ్చుకుంటూ సాగిపో...
నీ గురించి చెడు చెప్పేవారు కోకొల్లలున్నారు!!
ఆశలపందిళ్ళు అందరూ అల్లుకుంటూనే ఉంటారు
పూర్తయ్యేవి మాత్రం అదృష్టం అచ్చి వచ్చినవారిదే!