అనుకోలేదు

నీవు నా నుండి ఇంత త్వరగా దూరమైపోతావు అనుకోలేదు

నీవు ఎప్పటికీ నాతో కలిసుంటానని వాగ్దానమూ చేయలేదు..

నీవు నన్ను ప్రతీరోజూ తలుచుకుంటావో లేదో నాకు తెలియదు

నీవు ఇంత త్వరగా మర్చిపోతావని నేను అస్సలు కలగనలేదు

ఏదో బెంగ

 పైకి నవ్వుతున్నా లోలోన ఏదో బెంగ

ఈరోజు మాట్లాడి మరునాడు మాయం

ధైర్యాన్ని ఎంతని కూర్చుకోవాలో తెలీక

హైరానా పడుతున్న నిలత్రొక్కుకో లేక! 

నీతోడు

 చెప్పాలంటే ఎప్పుడూ సంతోషంగానే ఉన్నాను

నేనప్పుడూ నీదాన్నే, ఇప్పుడు కూడా నీతోడునే

కోపతాపాల ఆటవిడుపులో నీవలిగితే నేనోడాను

నేనప్పుడు అలిగితే, ఇప్పటికింకా నీవలిగున్నావు!

దేవుడు

అందం కావాలంటే బాహ్య రూపం చూడు

మనిషివి అయితే మనసును చూడు...

మానవత్వం కావాలంటే మంచిని పంచు

మంచి మానవత్వం కలిపితే దేవుడు చూడు   

అన్వేషణ

నేను నీకోసం నీరునై పారుతున్నా

నీ దాహం తీర్చే సెలయేరునై ఉన్నా

ప్రతి గుమ్మం గడపా నిన్ను వెతికాను

ఎప్పటికి అంతమయ్యేనో నా ఈ అన్వేషణ  

నీవాడు

 నిబ్బరం కలిగి ధైర్యంగా ఉండు

దిగులుపడి హైరానా పడకెప్పుడు 

నిన్ను వీడడు మరువడు నీవాడు

నీకు తోడు నీడా నీ జతగాడు..

చదరంగమే జీవితం

 ఒక్కొక్క అనుభవం ఒకో గడి అయి

కూర్చబడిన చదరంగమే ఈ జీవితం

ఆలోచించి ఆచితూచి అడుగెయ్యాలి 

ఏ గడి మరచినా చదరంగంలో గెలవం!

వాడకం..

వాడని ఇనుము తుప్పుపడుతుంది

కదలని నీరు స్వచ్ఛతను కోల్పోతుంది

బద్ధకం మెదడును నిస్తేజం చేస్తుంది..

అందుకే ఉత్తేజంగా ఉల్లాసంగా ఉండండీ 

అవసరం

చెప్పేది ముందు వినడం
వివేకంతో జవాబివ్వడం
ప్రశాంతంగా ఆలోచించడం
నిదానంగా నిర్ణయం తీసుకోవడం
మనిషికి ఎంతో అవసరం

ఆడమగ

మాయచేసి మంత్రం వేసేది ఆడువారు
బలం చూపి బలత్కరించేది మగవారు
ఇలా సరిపోయె కదా ఇరువురికీ జోడి
భగవంతుడు వేసెనాయె ఆడమగ బేడీ 

ఎక్కువ

అనుభవం నేర్పిన పాఠాలకు విలువ ఎక్కువ…
ఆచరిస్తూ చెప్పే మాటలకు ఆదరణ ఎక్కువ…
ఇష్టంతోచేసే పనులకు విజయాలు ఎక్కువ…
అందరిలో మంచినే చూస్తే ప్రశాఒతత ఎక్కువ!

కావాలి

నాకూ కావాలి పరిగెత్తించే నాదైన ఒక్కక్షణం
నాకూ కావాలి ఎదమూలల్లో దాగిన పరిమళం
నాకూ కావాలి నేను తాకాలనుకున్న ఆకాశం
నాకూ కావాలి కప్పుకునే ఆశలరెక్కలు దుప్పటి

కునుకు

మధ్య రాత్రిదాటి చాలసేపయ్యింది
దాదాపు లోకం నిద్రపోతుంది
కంటికి కునుకు మాత్రం రాకుంది
మెదడు పనికి మనసు జాలిపడింది

ఆశ

రెక్కలు విప్పిన మనసుని రెచ్చగొట్టి
ప్రేమాభిమానాలు ఇంధనంగా నింపి 
ఆకాశానికి అర్రులు ఆశగా చూసాను 
గమ్యం అగుపించక అల్లాడుతున్నాను!

కుతి..

చీకట్లోనే చాలా మంది స్వైరవిహారం
ముసుగుల్లో చూపుతారు సాహసవిన్యాసం
గూఢమైన కుతిరాతల్లో కృత్రిమ ఆనందం 
తెలియని కూడని కాపేక్ష రతి ఆస్వాదం!

అంతర్మధనం

తెలియని తహతహలతో లోలోన అంతరాయం
జవాబులు ఇవ్వలేని చిక్కుప్రశ్నలతో ఆరాటం 
మనసు అలజడులతో చెప్పలేని నిస్సహాయత 
అక్షర స్వరములై నిలచెనే భావ అంతర్మధనం!

ద్వారం

ఒక తలుపు మూసుకుపోతే
వేరొకటి తెరిచే ఉంటుంది....
మనమే మూసిన ద్వారం వంక 
చూస్తూ బేలగా ఉండిపోతుంటాం!!!

నాలో..

నాలోన తాను, తనలోన నేను
మరిచేము అనురాగ బంధాన మేను
నిండైన వెన్నెల్లో ఏకాంత తరుణాన
చూపుల్తో మౌనాన్ని దాల్చేము మేము..

వెలుగు

రేయంతా తారలు విరహంతో రగిలే
వెనుక తిరిగి చూడనన్న జ్ఞాపకాలు 
కాళ్ళ పగుళ్ళు ఆలోచనలై మండగా
బయట వెలుగు మదిన చీకటి కాసె!

ప్రేమంటే

ప్రేమంటే మనసులో పుట్టి ఆకాశం అంచులు తాకేది
ప్రేమంటే ఉదయించే వెలుగే కాదు అస్తమించే చీకటి 
ప్రేమంటే అనేకసార్లు మోడుబారినా చిగురించే ఆశలు
ప్రేమంటే నిట్టూర్పు నిరాశ సెగలు కాదు ఒక భరోసా!